Fíbín: "pléasc lúcháire agus sonais"

In 2003 a bunaíodh Fíbín, compántas óg, úr agus loinneach amharclainne Gaeilge, lonnaithe i gConamara, dírithe ar sholáthar dráma ardcháilíochta i nGaeilge do pháistí, do dhaoine óga agus dóibh siúd a bhfuil an croí óg iontu. Le cumasc nuálach dráma agus puipéadóireachta ar an aon ardán, cruthaíonn siad stíl ardfheiceálach léirithe a sháraíonn gach teorainn teanga. Le léirithe Fíbín, bíonn teacht ag cách ar an teanga Ghaeilge!!

Baineann Fíbín fosta leas as tallannacha dúchais na Gaeltachta ? aisteoirí, puipéadóirí, dearthóirí agus scriptsríbhneoirí, agus iad ag cruthú a gcoincheapa úra draíochtúla san amharclann.

Dhá sheó do pháistí scoileanna náisiúnta atá cruthaithe go dtí seo ag Fíbín: AN GABHA AGUS A GHASÚIR agus NA FOGHLAITHE MARA AGUS AN EOCHAIR ÓRGA. Tar éis a gcamchuairt rathúil anuraidh ar choláistí samhraidh agus ar mheánscoileanna le STAIR NA HÉIREANN ? CINEÁL! tá siad faoi láthair ar an bhóthar arís le seó samhraidh 2005 do dhéagóirí: DIABHLAÍOCHT DHÉAGLÁIN.

Ó bunaíodh an compántas, níos lú ná dhá bhliain ó shin, tá a gcur chuige nuálach don amharclann molta ag na léirmheastóirí, agus fuair siad stádas oifigiúil ó Chomhairle Ealaíon na hÉireann. Le bliain anuas, ainmníodh iad do dhuaiseanna Amharclainne Náisiúnta Irish Times/BSL agus bhain siad duais ealaíon Chomhairle Contae na Gaillimhe/BAÉ amach.